Да постирам пред пак да снема струја….

Во последните неколку години драфтот даде доста квалитетни плејмејкери, но овој пат тоа нема да биде случај со оглед на тоа дека понудата на организатори на играта и не е баш богата. Всушност, таа е многу послаба во однос на повисоките играчи и речиси сигурно е дека првиот плеј избран овој јуни нема да биде меѓу првите пет. Како најголем талент се спомнува Мајк Конли џуниор од Охајо Стејт и само на него му се даваат некакви шанси да биде избран од тимовите кои се дел од драфт-лотаријата (Топ 14). Главните атрибути на Конли се брзината и прегледноста на теренот кога ќе тргне на влез. Голем број на скаути го споредуваат со Тони Паркер кога тој влезе во лигата поради слабиот шут однадвор кој им е заеднички. Сепак, во моментов пореална е споредбата со Ти-Џеј Форд.
Покрај Конли, не треба да се заборават Ејси Ло од Тексас АМ и Џаварис Крајтентон од Џорџија Тек. Ло е најискусниот во оваа класа организатори на играта и би можел веднаш да биде од помош за тимот кој би го избрал. Крајтентотн е талент на кој сепак ќе му треба време да созрее, но располага со голем потенцијал.

1. Мајк Конли Џр.
Роден на 11.10.1987 во Индијанаполис, Индијана
Висина/Тежина: 185 см., 81 кг.
Колеџ: Охајо Стејт
НБА споредба: Ти-Џеј Форд

2. Ејси Ло
Роден на 25.01.1985 во Далас, Тексас
Висина/Тежина: 188см., 88кг.
Колеџ: Тексас АМ
НБА споредба: Чонси Билапс

3. Џаварис Крајтентон
Роден на 31.12.1987 во Атланта, Џорџија
Висина/Тежина: 196 см., 88кг.
Колеџ: Џорџија Тек
НБА споредба: Стив Френсис

4. Родни Стаки
Роден на 21.04.1986 во Кент, Вајоминг
Висина/Тежина: 192 см., 93 кг.
Колеџ: Источен Вашингтон
НБА споредба: Дежуан Вагнер

5.Гебриел Пруит
Роден на во
Висина/Тежина: 193 см., 77 кг.
Колеџ: УСЦ
НБА споредба: Девин Херис

Слично како и кај плејмејкерите, и ситуацијата со бековите-шутери не е најсјајна. Можеби и најслаба на овој драфт е понудата на оваа позиција на која во моментов нема ниту еден играч кој би можел сериозно да влијае на играта на тимот кој би го избрал. Има неколку интересни играчи како Ник Јанг, Руди Фернандез, Дерик Бајарс и Декуан Кук, но ниту еден од нив нема да привлече големо внимание, барем не кога станува збор за тимовите кои бираат во првите десет.
Најинтересен во оваа група е Јанг, кој по потреба може да игра и на плеј и кој има еден од најдобрите шутеви од полудистанца на овој драфт. Тој е тип на играч кој би можел да израсне во расен стрелец за некоја година, но ќе му треба сезона-две напорна работа за да се навикне на играта во НБА.
По Јанг, доста високо на сите листи котира Шпанецот Руди Фернандез, кого го споредуваат со Ману Џинобили. Бекот на Хувентуд би можел да остане со својот тим уште една сезона и тоа го прави ризичен избор за послабите тимови, додека екипите кои се дел од елитата можат да си го дозволат тој луксуз да го чекаат една година.

1. Ник Јанг
Роден на 01.06.1985 во Резеда, Калифорнија
Висина/Тежина: 198 см., 91 кг.
Колеџ: УСЦ
НБА споредба: Џош Хауард

2. Руди Фернандез
Роден на во 04.04.1985 во Мајорка, Шпанија
Висина/Тежина: 199 см., 78 кг.
Тим: Хувентуд
НБА споредба: Ману Џинобили

3. Морис Алмонд
Роден на 02.02.1985 во П.Спрингс, Џорџија
Висина/Тежина: 199 см., 97 кг.
Колеџ: Рајс
НБА споредба: Мајкл Ред

4. Дерик Бајарс
Роден на 25.04.1984 во Мемфис, Тенеси
Висина/Тежина: 201 см., 102 кг.
Колеџ: Вандербилт
НБА споредба: Брендон Рој/Шејн Батие

5. Декуан Кук
Роден на 28.04.1987 во Дејтон, Охајо
Висина/Тежина: 197 см., 95 кг.
Колеџ: Охајо Стејт
НБА споредба: Лери Хјуз