Веројатно никого не изненади веста за отпуштањето на Ренди Витман во секогаш досадната Минесота. Всушност, на човекот не ни смееше да му биде врачена таа одговорност лани, исто како што Тандер (Соникси) не смееја да му бидат доделени на Карлисимо. Она што е интересно е веста дека местото на Витман му припадна на Кевин Мекхејл, кој за да може целосно да и се посвети на својата нова позиција во клубот е ослободен од сите свои претходни задолженија, кои беа многу повисоки од тие на еден тренер. Потпретседателската функција сега ќе ја извршува некој друг, додека Кевин нема да има речиси никаков удел во донесувањето одлуки околу играчкиот кадар на тимот.

Тоа секако дека ги израдува сите малку фанови на Вулфси на кои и онака им е преку глава од неспособноста на Мекхејл како оперативец и кои сега се на чекор до остварувањето на својата голема желба – да го видат Мекхејл, кој со неколку свои одлуки буквално го врати клубот години наназад, како ја напушта Минесота следното лето.

Можеби ќе му понудат некоја почесна функција во Бостон со оглед на тоа дека минатото лето им врачи еден доста голем подарок.

* * * * * * * *

Кога сме кај екс-играчи, Владиаторот и Вебер, за успомен и дуго сечање на времето кога Сакраменто имаше свој НБА клуб Кингси оваа сезона засекогаш ќе ги пензионираат дресовите (т.е. броевите) на Крис и Владе. За вториот се знае дека церемонијата ќе се одржи на 31. март следната година кога во Арко гостуваат Хорнетси од кои дел е некогашниот играч на Кингси и голем пријател на Дивац, Пеџа Стојаковиќ. За Вебер уште нема датум, но се зборува дека тоа ќе се деси или во февруари или во март. Како и да е, пред Владе. Ете и Кингси со нешто да се пофалат.

* * * * * * * *

Додека чекаа да почне нивниот дуел со Милвоки, играчите на Лејкерси го гледале дуелот помеѓу Индијана и нивните “пријатели“ од Бостон. Мислам дека не мора да објаснувам за кого навивале Коби енд ко. Тоа е уште еден доказ дека Бостон и титулата се единствено во мислите на Лејкерси, но и доказ дека тие се опседнати со Селтикси и она што им се дешава на нив.